காதல் ஒரு காதல் அது காமெடியீல...

காதலை சேர்த்தி வைப்பது சினிமாவில் வேனா பார்ப்பதுக்கும், கேட்பதுக்கும் ஜாலியா கிளுகிளுப்பா கலகலன்னு இருக்கும், ஆனால் நிஜவாழ்வில் அது ஒரு சோதனை, மற்றும் வேதனை, நான் பவானியில் இருந்த போது ஒரு நண்பன் இருந்தான் அவன் பேரு குமார், சலூன் கடை வெச்சிருந்தான் கட்டிங் வெட்டப் போன எனக்கு சாயங்காலம் கட்டிங் சேர்ந்து போடுற அளவுக்கு நண்பனாயிட்டான் ஆளு நல்ல துறுதுறுன்னு இருப்பான், "கொஞ்ச நாளாவே என்னை ஒரு பொண்ணு லுக்கு விடுது பாஸ்!" அப்படின்னு சொன்னான், யார்டா..அது? கேட்டேன் நான் ஒரு நாளைக்கு காட்டுகிறேன் அப்படின்னா..! சரின்னு நானும் விட்டிருந்தா பரவாயில்லை..."நீ பண்ணுடா நான் பார்த்துக்கிறேன்" அப்படின்னு சுதியில வீரமா அவன்கிட்ட சொல்லிட்டேன். 

ஒரு நாள் அவன் கடைக்கு போனேன்...பேசிக்கொண்டு இருந்தபோது, வாங்க என் ஆளை காட்டுகிறேன் என்றான். இருவரும் பஸ்ஸ்டேண்டுக்கு என்னுடைய பைக்கில் போனோம் லவ்வ சொல்லிட்டியா...? அப்படின்னு கேட்டேன் அதெல்லாம் சொல்லிட்டேன் அவளும் ஓகேன்னு சொல்லிட்டா அப்படின்னா..!பொண்ணு யாருன்னு சொல்லலை....ஓரமா நின்ன டவுன் பஸ்ல ஏறி ஒரு பொண்ணு பக்கத்துல உக்கார்ந்தான் இதுதான் அந்த பொண்ணு அப்படின்னா...! நான் அந்த பொண்ணைப் பார்த்தேன் எனக்கு திடுக்குன்னு போச்சு...!

அந்த பொண்ணு பேரு வீனா! அவிங்க அப்பன் பா.ம.க கட்சியில ஒரு பொறுப்புல இருக்கிறான், இவிங்க காதல் மேட்டர் தெரிஞ்சுது அவனை கும்பலா கும்மிருவாங்க...! எஸ்கேப் ஆனா இங்கிருக்கிறவனுகளை நோண்டி நொங்கெடுத்திருவானுக, இப்ப இவனுக்கு குளோஸ் பிரண்டு நான்தான்னு ஊருக்கே தெரியும்..! அடப்பாவி சனியனை கொண்டுவந்து என் சட்டைக்குள்ள விடுறானேன்னு யோசிச்சிட்டு இருக்கிறேன், நான் என்னவோ செந்தூரப்பூவே விசயகாந்து மாதிரி நீங்க தான் பாஸ் என் காதலை சேர்த்தி வைக்கனும் அப்படிங்கிறான். அந்த பொண்ணும் "ஆமாங்க அண்ணா" அப்படிங்குது! அடப்பாவி இரண்டு பேரும் எஸ்கேப் ஆனா கும்முற கும்முல குடிச்ச பீரெல்லாம் வெளிய வந்திருமே! 

மனசுக்குள்ள பயம் இருந்தாலும்....சரிடா அப்படின்னுட்டு ஓடிவந்திட்டேன், அதுக்கு பிறகு அவன் கடைக்கு அடிக்கடி நான் போறதில்லை..! அவனை கட் பண்ணிவிட்டாலும் வாங்க பாஸ் தண்ணியடிக்கலாம் சினிமாவுக்கு போகலாம் என்று போன் போடுவான் இல்லப்பா! கொஞ்சம் டைட் பணம் இல்லை அப்படின்னா வாங்க பாஸ் நான் இருக்கிறேன் அப்படியிம்பான், வேலை வெட்டியில்லாம காஞ்சு போய் கிடந்த நேரம் அது..! ஒரு பீருக்கு ஆசைப்பட்டு நம்ம மென்னியெழும்ப இழக்கப் போறோம்ன்னு மனசு சொல்லுது...! நடப்பது நடக்கட்டும் அப்படிங்கிற குருட்டு தைரியத்தில் நானும் அவனுடன் பழக ஆரம்பித்தேன்!

நான் பயந்த மாதிரியே நடந்து போச்சு.....!ஒரு நல்ல நாள் அதுவுமா பையன் புள்ளைய கூட்டிக்கிட்டு எஸ்கேப்! நைட் பத்து மணிக்கு வந்து கொத்தோட அள்ளிக்கிட்டு போயிட்டானுக பதினெட்டாம் குடி படத்தில் வருகிற மாதிரி ஒரு நாலு பிரண்டுகளை வேன்ல தூக்கி போட்டு ஸ்டேஷனுக்கு கூட்டிட்டு வந்திட்டாங்க....எஸ்.ஐ மிரட்டுகிறார் சொந்தக்காரன்ல இருந்து அல்லு சிண்டு பசங்க எல்லாம் எங்களை மிரட்டுகிறான், நமக்கு பாடி ஸ்ட்ராங் பேஸ்மட்டம் வீக்குன்னு வடிவேல் காமடியப் பார்த்திட்டு பக்பக்குன்னு சிரிச்சிருக்கிறேன்! ஆனா எல்லாருக்கும் இந்த மாதிரி சமயத்தில் நமக்கும் அப்படித்தான்டான்னு நெனைச்சு நொந்திட்டேன்.

எஸ்ஐ சொல்றாரு சாயங்காலத்துக்குள்ள கிடைக்கிறாங்களான்னு பார்ப்போம்...! கிடைக்கல நைட் லாக்கப்ல விட்டு நொங்கினா இவனுக கிட்ட இருந்து உண்மை தானா வரும் அப்படிங்கிறாரு...! அப்பத்தான் காதலை சேர்த்தி வைக்கிறேன்னு சொன்ன செந்தூரப்பாண்டி! மாத்தியோசிச்சேன் "ஆண்டவா..! அந்த நாதாரிக இவங்க கிட்ட மாட்டிக்கனும்..."அப்படின்னு! 

இதுல செம காமடி என்னன்னா...!இவன் ரெகுலரா டீ குடிக்கிற டீ கடைக்காரரையும் தூக்கிட்டு வந்திட்டானுக அவர் புலம்பராரு "அவன் எனக்கு நூத்திஅம்பது ரூவா பாக்கி வைச்சதுமில்லாம....என்னையும் மாட்டி விட்டுட்டு போயிட்டானே..!" இப்படின்னு புலம்பிட்டு இருந்தாரு..! நான் அவர்கிட்ட "சம்பதமில்லாம உங்களை ஏன்னா தூக்கிட்டு வந்திருக்காங்க..?" அப்படின்னு கேட்டேன்...!

இப்ப புள்ளையோட அப்பனுக்கு உதவியா தேடுகிற அல்லக்கை கும்பலுக்கு எனக்கும் ஆகாது, அதுவில்லாம நான் ரஜினி ரசிகர் மன்றத்தில் இருக்கிறேன் மருத்துவர் ரஜினிய பற்றி பேசினப்ப கண்டன போஸ்டர் அடிச்சு ஒட்டினேன் அப்ப இருந்தே இவிங்களுக்கும் எனக்கும் வாய்க்கா தகராறு...சமயம் கிடைச்சதும் கோர்த்து விட்டுட்டானுக நான் அப்பாவி! என்ற அவரை பார்த்து பரிதாபமாக இருந்தது! நாம கூட அவன்கிட்ட பீரு வாங்கி குடிச்சிருக்கோம் இவரு கடனும் கொடுத்திட்டு...மாட்டிக்கிட்டாரே! என்று. பரிதாபமாக இருந்தது!

நல்லவேளை மாலைக்குள் அரச்சலூர்க்கு பக்கத்தில் ஒரு செங்கல் சூளையில் இருந்த காதல் ஜோடிகளை கூட்டி வந்து...பிரித்து அந்த புள்ளைய அப்பனுடன் அனுப்பிவிட்டார்கள், இரவோடு இரவாக வீனாவை ஒருவனுக்கு திருமணம் முடித்து விட்டார்கள் பையன் கொஞ்ச நாள் தாடியுடன் சுற்றிவிட்டு இப்பொழுது மலேசியா போயிட்டான்...போனவாரம் பவானி போயிருந்தேன் ஒரு பேக்கரியில் டீ குடிச்சிட்டு இருந்தேன், அப்ப வீனாவும் அவ புருசனும் இரண்டு குழந்தைகளுடன் பேக்கரிக்கு கேக் வாங்க வந்தாங்க.....பார்த்தேன் பேசலை! ஆனா நான் என்னவோ செந்தூரப்பூவே விசயகாந்து மாதிரி என்கிட்ட சொன்னாங்க பாருங்க அதை நெனைச்சு சிரிச்சுக்கிட்டேன்...!